FESTAS DE BOIRO 2008

Venres 4 de xullo (concertos a partires das 22 h.):

- Obrint Pas (Países Cataláns)
- Os tres trebóns (Galiza)
- Boom Club (Francia)
- Humble (Portugal)

Sábado 5 de xullo:

21h. Concerto na Carpa da Diversidade:

- Dúa Keresú (música galega-guaraní)
- Xerock (rock galego)

00.00 Escenario principal:

- Banda Bassotti (Italia)
- Bob da Rage Sense (Angola)
- Nao (Galiza)
- Supersanwich (Galiza)

Domingo 6 de xullo:

21.30h. Tuna Rastarari (fusión en galego)

Luns 7 de xullo:

13h. Bellonmaceiras Quinteto

Martes 8 de xullo:

13h. Serra-lhe aí!!!

Mércores 9 de xullo:

13h. BONOVO

Tódalas actividades no Parque Municipal da Cachada.

PD: adivinade que grupo político do concello de Boiro está tratando de impedir a actuación de Banda Bassotti. Hainos que sonche ben cansinos…

SKACHA + ARENGA + KASKARRIA PUNK!!

O venres 4 de xullo terá lugar na sala Coliseo de Pontedeume a partires das 22 horas un concerto de punk-rock coas bandas:

· Skacha: mítico grupo vigués de street-punk

· Arenga: potente punk-rock desde Pontedeume

· Kaskarria Punk!!: punk entolecido desde Cariño.

A entrada custa 6 €. Non faltedes.

CULTURA QUENTE

Chega o verán e con el os distintos festivas e festas repartidos por toda a xeografía nacional, sendo o Cultura Quente de Caldas de Reis xa todo un clásico logo de once edicións. Esta cita caracterízase pola diversidade multidisciplinar da súa proposta (que podedes consultar polo miúdo na web oficial do festival). Se nos cinguimos ao eido musical quedoulles un cartaz bastante currado, onde se mesturan diferentes estilos e musicas, como o exotismo folclorista de Taraf de Haidouks ou Café Tacuba, o máis coñecido indie-pop-rock de The Sundays Drivers ou Vetusta Morla ou as propostas máis electrónicas de Alex Gopher ou John Aquaviva.

Haberá, logo, que deixarse caer por Caldas esa fin de semana.

Por certo, tanto a entrada como a acampada son de balde.

con V de Valarés

preme na imaxe para acceder á web do festival

Este vindeiro sábado 21 de xuño celebrarase na praia de Valarés (Ponteceso) a xa quinta edición do festival Con V de Valarés. Este festival foi argallado por un grupo de amigos como unha alternativa á masificación ás festas da zona, ofrecendo outra posibilidade á mocidade da vila de Ponteceso e arredores para a noite de San Xoán. A iniciativa foi medrando cos anos en asistencia, actividades e organización, establecéndose así como unha data imprescindíbel no panorama musical do país.
A parte reivindicativa desta xuntanza ven dada pola reclamación do auténtico topónimo desta praia pontecesá, Valarés con V, como avala un artigo do especialista Fernando Cabeza Quiles.
O cartaz deste ano está conformado polas seguintes bandas:
- Niños Mutantes: estes granadinos son xa unha referencia dentro do power-pop do estado; presentan novo disco, Todo es el Momento, logo do seu gorentoso álbum de versións.
- Woocake: banda galega de pop-rock resultado dunha variada amalgama de influencias (sons dos 60, punk, new wave,…).
- MEU: estes coruñeses contan como vocalista con Nacho Mora, todo un ex da Elephant Band. O vindeiro 11 de outubro ponse á venda o seu novo traballo, Did You Hear? (Rock On!).
- Sac Noir: Cosmopolita grupo de jazz que incorpora no seu repertorio distintos tipos de música, como a Claismer xudía, a musette francesa ou a música folclórica (galega incluída).
- Pecharan o evento DJ The Cricket e Mahoney VJ.

TELEPHONES ROUGES+LOS SANTOS+DIADERMIN+THE

Este vindeiro sábado 24 de maio poderedes, se vos presta, gozar dun cuadruplo concerto no Pub Velvet da Coruña (aínda que no cartaz poña Playa Club, o concerto trocou de ubicación), onde poderedes percorrer nunha viaxe iniciática o lado máis bizarro do panorama musical galego. Polo módico prezo de 5 euros terase a posibilidade de ver e escoitar a:

· Telephones Rouge: rock contemporáneo desde O Grove.

· Diadermin: Parella Lo-Fi/electrónica/punk desde Boiro e Rianxo.

· Los Santos: Desde Sada ”a mellor banda de rock´n´roll de Galiza”, que interpretará o seu lúcido e sereno punk-twist.

· The: a banda máis veterana da escena underground galega.

Non sexas animal e asiste (se non tes outra cousa mellor que facer, claro).

CONCERTO: ataque escampe+chotokoeu+ultraqans

A partires das 20 horas deste próximo mércores 13 de maio, no aparcadoiro da Facultade de Filoloxía da Coruña, haberá un triplo concerto a cargo de:

· Ataque Escampe: Grupo auto-denominado como de “rock de serie B” formado en Compostela e integrado por xente procedente de diversas partes do país. A destacar o eclecticismo do seu son e a ácida retranca das súas letras. Veñen de presentar recentemente o seu disco Galicia es una Mierda.

· Chotokoeu: Banda de fusión desde A Coruña, cun obxectivo claro: ofrecer unha boa de festa a base de rumba, ska, reggae e outras herbas. O seu repertorio comprende desde temas instrumentais ata outros con textos propios.

· Ultraqans: banda de spiz-folc desde A Coruña, integrada por Antom Papaqueijos, Fram Amil, Tino Papaqueijos e Aarom.

O concerto é de balde e haberá buses desde as oito ata o remate do evento.

CORNELIUS no Mardi Gras (A Coruña)

Envioume Rocío xa a semana pasada información sobre o concerto que Cornelius van dar na sala Mardi Gras da Coruña, pero por falta de tempo non puiden publicala ata agora. Os datos son os seguintes:

 

Lugar: Sala Mardi Gras (r/Travesía da Torre, nº 8.)

Data: 9 de maio de 2008

Hora: 22:00 h.

Prezo: 6 €

 

Cornelius é unha banda de Vilagarcía de Arousa formada por David “Chiquillo”, Antonio Casado, Toni B. Willisch, José Vilas, Andoni Arcos e Ton Risco.

A traxectoria de Cornelius comezou no ano 2005 coa publicación dunha primeira maqueta. Desde entón curtíronse xirando por Galiza e participando en diversos certames, onde se fan con varios premios. A integridade do seu repertorio é en inglés.

O seu álbum de debut chámase, paradoxalmente, Greatest Hits, e nel mestúranse diversos estilos como rock, funk, ska, soul,…

Os traballos de mestura e masterización correron a cargo de Segundo Grandío no estudio Casa de Tolos.

Se tivese que destacar algún corte de Greatest Hits quizais quedaría con Dangeours, unha moi persoal versión dun tema do xamaicano Peter Tosh, ou co intenso peche do álbum, Dragonfly.

Greatest Hits pódese mercar (en soporte físico ou dixital) en grandes cadeas (FNAC, Gong,…), a través da web www.pai-musica.com ou nas principais tendas de discos do país.

 

LA BRUTA FEST (A Coruña)

A xente de El Beasto Recordings celebra o seu décimo aniversario coa organización da primeira edición do La Bruta Fest os días 5, 6 e 7 de xuño nas salas Mardi Gras e Playa Club da Coruña, que nace coa necesaria intención de paliar a falta dun festival de rock´n´roll na cidade (coa excepción do simulacro do Noroeste Pop Rock). Cada noite contará coas actuacións de dúas bandas combinadas cun espectáculo de burlesque (a cargo de Fancy Chance). Logo haberá cadansúas festas post-concerto nos locais Atomic Club e Nordic (Playa Club), a cargo dos pinchas Alberto Chao, Marky Las Vegas, Roi, Alex Big Voxx Man e The Hyppestofcats. Podedes obter máis información na páxina web de El Beasto Recordings (a que accederedes se premedes na imaxe de enriba), onde ademais poderedes participar no sorteo de dez bonos para o festival. O cartaz de La Bruta Fest é o seguinte:

 

Xoves 5 (Mardi Gras):

• The Phantom Keys: Unha das bandas máis prometedoras do garage estatal.
• Die Cadaveras: Rock salvaxe da man de Manu Passadena e Indy Tumbita.

 

Venres 6 (Playa Club):

• The Fuzztones: Grupo mítico de Garage-Psych-Punk desde New York.
• The Morlocks: outra banda lendaria, que ademais presenta o seu novo traballo Easy Listening For The Underachiever.

 

Sábado 7 (Playa Club):

• The Flaming Sideburns: desde Helsinki, demostrando que Escandinavia é potencia no eido do garage.
• The Moving Sounds: Enorme banda sueca de garage-beat.

 

Entrada xoves: 9 €
Entrada venres: 17 €
Entrada sábado: 17 €
Bono para venres e sábado: 30 €

 

Entradas á venda en:

 

A Coruña:

• El Beasto Shop: R/Galera, 3 baixo. Tlf. 881 885328
• Sailor Diego Tatoo: Ronda De Outeiro, 274. Tlf. 881 883260

Compostela:

• A Reixa Tenda: R/Mazarelos, 9. Tlf. 981 575138

Pontevedra:

• Carnaby: R/Isabel II, 18. Tlf. 986 844067

Vigo

• Monkeybone Shop: Centro Comercial Gran Vía, Local 14. Tlf. 986 114386

Ourense:

• Serie B: R/Valle Inclan, 12. Tlf. 988 247557

Inauguración do C.S. Gomes Gaioso

Os próximos días 25 e 26 de abril terán lugar diversos actos para celebrar a inauguración do C.S. Gomes Gaioso, sito na rúa Marconi nº9 baixo, no barrio de Monte Alto da Coruña. No propio blogue do C.S. poderedes obter máis información ao respecto. Se nos cinguimos ao estritamente musical terán lugar unha serie de concertos na Sala Ínox (rúa Orillamar, 44) e no local do propio centro. O cartaz é o seguinte:

 

Venres 25 de abril na sala Ínox, a partires das 22 horas (billete 3 euros):

Trapalhada: Ska-punk desde Monte Alto, A Coruña

Ulträqäns: grupo de música balcánica integrado por Antom Papaqueijos, Fram Amil, Tino Papaqueijos e Aarom.

 

Sábado 26 de abril, no C.S. Gomes Gaioso, a partires das 22:30 horas:

Nelsom Quinteiro: Cantareiro nado en Cangas e residente na Coruña.

Xabier Diaz: fundador de Rumbadeira, cantante titular da compañía Nova Galega de Danza, o seu último disco chámase Coplas para Icía e é o actual cantante de Berrogüetto substituíndo a Guadi Galego.

 

MARLANGO en directo

Marlango, é dicir Leonor Watling, Alejandro Pelayo e Óscar Ybarra, tocaron este pasado sábado no Pazo da Cultura de Pontevedra, un concerto incluído na xira de presentación do seu terceiro traballo, The Electrical Morning, que os levará tamén a tocaren na Coruña, Ourense e Ferrol. The Electrical Morning ven a confirmar a madurez dun proxecto que superou hai tempo o estigma de ser a banda de Leonor Watling.          

O son de Marlango xermolou a partires da semente que a música de Tom Waits insertara nos ouvidos dos seus integrantes, para medrar logo baixo a luz de referentes como PJ Harvey, Mark Lanegan ou Radiohead.

Leonor Watling asina tódalas letras do disco e as interpreta cunha voz que pandea entre unha grande variedade de rexistros, conseguindo así o ambiente sonoro propicio para cada sentimento que desexa expresar.

The Electrical Morning foi producido por Alejandro Pelayo, e contén sonoridades derivadas de instrumentos monofónicos como as Ondas Martenot ou o Minimoog (sexan o que carallo sexan estes chismes), ademais dunha maior contundencia no uso das guitarras, o que lle confire ao álbum un son diferente ao dos seus antecesores.

Participou tamén na gravación do disco os músicos que acompañan a Marlango nos seus directos, é dicir Gonzalo Maestre (batería), Vicent Huma (guitarra) e Manuel Bagüés (baixo).

 En resumo, atopámonos ante proxecto musical que esperta distintas reaccións entre o público; hai quen os considera unha banda sobrevalorada ou quen simplemente pensa que Leonor está moi boa, pero tamén existe un importante grupo de incondicionais que os segue e goza da súa música xa desde o primeiro disco. Se non tes clara a túa opinión ao respecto tes varias posibilidades de velos en directo e decidirte:

 

11/04/2008 - 20:30:00
Auditorio Municipal
Ourense

12/04/2008 - 20:30:00
Teatro Colón - Caixa Galicia
A Coruña

01/05/08 - 20:30

Teatro Jofre

Ferrol